BREAKING NEWS

သခွားပွင့်အား ဝတ်မှုန်ကူး⁠ပေး⁠ခြင်း ( Cucumber Pollination )

သခွားသည် ဖရဲ၊ သခွားမွှေး၊ ကြက်ဟင်းခါး၊ ပုံလုံတို့နှင့်အတူ မျိုးရင်း( Cucurbitaceae )တွင် ပါဝင်သည်။
၎င်း အပင်များတွင် တစ်ပင်ထဲ၌ အဖိုပွင့်နှင့် အမပွင့် သီးခြားတည်နေသော ပင်တည်းလိင်စုံ(Monoecious) အမျိုး အစားဖြစ်သောကြောင့် ပွင့်ခြားဝတ်မှုန်ကူးမှသာလျှင်မျိုးအောင်နိုင်သည်။ သို့ပါသောကြောင့် ၎င်းအပင်များ မျိုးအောင်စေ ရန် အင်းဆက်အကူအညီဖြင့် ဝတ်မှုန်ကူးခြင်း( Entomo-phily )ဖြစ်စေ၊ လူဖြင့် ဝတ်မှုန်ကူးပေးခြင်း( Hand pollination )ဖြင့် ဖြစ်စေ နည်းလမ်းနှစ်သွယ်ဖြင့် ဆောင်ရွက်နိုင်သည်။

အင်ဆက်အကူ( Entomophily )ဖြင့် ဝတ်မှုန်ကူးခြင်းသည် သဘာဝနည်းလမ်း ဖြစ်သောကြောင့်မိမိစိုက်ခင်းအတွင်း ဝတ်မှုန်ကူး အင်းဆက်များလာရောက်စေရန် စီမံပေးရုံဖြင့် ကရိကထ မများပဲလုပ်ငန်းပြီးမြောက်စေသည်။ သို့သော် မျိုးစပ်ရန်နှင့်မျိုးယူရန်အတွက်ဆိုပါက ယခုနည်းလမ်းသည်
သင့်လျော်ခြင်းမရှိချေ။

ဒုတိယနည်းလမ်းဖြစ်သော လူဖြင့် ဝတ်မှုန်ကူးပေးခြင်း( Hand pollination )လုပ်ငန်းသည် ကရိကထများသော်လည်း မျိုးအဖြစ်ခံယူခြင်း၊ မျိုးစပ်ခြင်းတို့တွင်အားသာချက် များစွာရှိသည်။ Pollination control ကောင်းစွာပြုလုပ်နိုင်သည်။
သာမန်စိုက်ခင်းများတွင် လုပ်လေ့လုပ်ထနည်းသော်လည်းသိပ္ပံနည်းကျ စီးပွားဖြစ် စိုက်ခင်းများတွင်ပြုလုပ်ကြသည်။

ဖရဲ၊ သခွားပင်များကို ဝတ်မှုန်ကူးပေးခြင်း ဆိုသည်မှာအဖိုပွင့်မှ ဝတ်မှုန်များကို အမဝတ်မှုန်ခံပေါ်သို့
ရောက်ရှိ စေခြင်းဖြစ်သည်။ ဝတ်မှုန်ကူးပေးရန်ဆောင်ရွက်မည်ဆိုပါက မိမိတို့၏ အပင်သည် ကျမ်းမာသန်စွမ်း၍ ရောဂါ/ပိုးမွှားကင်းစင်သောအပင်များဖြစ်ရပါမည်။

အရွယ်ရောက် ပန်းပြသည်နှင့် ဝတ်မှုန်ကူးပေးသည့် လုပ်ငန်းအား စတင်ဆောင်ရွက်နိုင်သည်။ အမပွင့်သည် ပန်းပွင့်လာသည့်အချိန် ယေဘုယျအားဖြင့် နံနက် ၇ နာရီမှ ၁၀ နာရီအတွင်း ဆောင်ရွက်ရမည်။ ထို အမပွင့်ဝတ်မှုန်ခံပေါ်သို့ အခြားအပင်မှ အဖိုပွင့် ၂ ပွင့်ခူးယူ၍ အဖိုဝတ်မှုန်များ ရောက်ရှိစေရန်ပြုလုပ်ပေးရမည်။

ယင်းသို့ ဆောင်ရွက်ရာတွင် ဆေးသုပ်စုပ်တံအသေးဖြင့်ဖြစ်စေ၊ နားကြပ် ဂွမ်းတံဖြင့် ဖြစ်စေ၊ အမပွင့်ပေါ်သို့အဖိုပွင့်၏ ဝတ်ဆံတိုင်ဖြင့် ဖြစ်စေ တိုက်ရိုက်ထိစပ်ကာအသာအယာ ဆောင်ရွက်ပေးနိုင်သည်။
ဝတ်မှုန်ကူးပေးရာတွင် မြန်နိုင်သမျှ မြန်ဆန်စွာဆောင်ရွက်ရသည်။ မျိုးအဖြစ်ခံယူမည်ဆိုပါက
အပင်၌ ပထမဆုံးအပွင့်ကို ချန်လှန်၍ ဒုတိယအပွင့်နှင့်နောက်ပိုင်းထွက်သော အပွင့်များကိုသာ မျိုးခံသင့်သည်။ တစ်ပင်လျှင် သုံးပွင့်ခန့် ဝတ်မှုန်ကူးပေးပြီး စိတ်ကြိုက်သီးတစ်လုံးကိုသာ မျိုးခံယူရမည်။

ဝတ်မှုန်ကူးပြီးနောက် သေချာမှတ်သား၍ စက္ကူအိပ်စွတ်ပေးခြင်း( သို့မဟုတ် ) အခြားသောအပွင့်များမှ ဝတ်မှုန်များရောက်ရှိမလာစေရန်ဆောင်ရွက်ပေးရမည်။ ဝတ်မှုန်ကူးပြီး ၅ ရက် ( သို့ ) တစ်ပတ်ခန့်တွင် စိတ်ကြိုက်တစ်လုံးသာချန်ပြီးအဆင့်မမီသော အခြားအသီးကင်းများကို ချွေပစ်ရမည်။

မျိုးခံယူရန် မဟုတ်ပဲ အသီးရောင်းချရန်အတွက် ဆိုပါက မျိုးအလိုက် ချန်ထားရမည့် အသီးအရေအတွက်ကိုသင့်လျော်သလို ထားရှိနိုင်သည်။ ဥပမာ – သခွားတွင်၁၅ လုံးထက်မပိုသော အရေအတွက် ဖရဲ၊ သခွားမွှေးအတွက် ၁ လုံး ၂ လုံး ၃ လုံး အစရှိသဖြင့် ချန်ထားနိုင်သည်။ မိမိ လိုချင်သည့်အသီးအရေအတွက်ထက် အပိုစောင်း၍ ဝတ်မှုန်ကူးပေးထားရမည်။သို့မှသာ အဆင့်မီသော အသီးများကို စိတ်ကြိုက်ရွေးချယ်နိုင်မည်ဖြစ်သည်။

ယခုအခါ မြန်မာတောင်သူအများစုသည် အထွက်ကောင်းနိုင်ငံခြား စပ်မျိုးများကို လွန်စွာအားထားနေပြီး ဒေသခံမျိုးများမှာ နည်းပါးစပြုလာသည်။မိမိ ဒေသ မူရင်းအထွက်ကောင်းမျိုးများကို ရွေးချယ်ကာ မျိုးအဖြစ် စနစ်တကျခံယူ၍ မျိုးထိန်းသိမ်းသည့်အနေဖြင့်စိုက်ပျိုးထားသင့်သည်ဟု ထင်မြင်ယူဆမိပါသည်။သို့မဟုတ်ပါက ဒေသခံမျိုးများ ပျောက်ပျက်သွားနိုင်သည်။နောင်လာနောင်သား စိုက်ပျိုးသူများအား ဒေသမျိုးဟုဆိုလိုက်သည်နှင့် အရုပ်ရေးပြရမည့် အဖြစ်မျိုး
ရောက်ရှိသွားနိုင်သည်။

ဒေသခံ မျိုးများတွင် အားနည်းချက်များရှိသော်လည်းအားသာချက်များလည်း ရှိကြသည်။ ကျွမ်းကျင်သောပညာရှင်များ၏ အကြံဥာဏ်ရယူကာ ဒေသခံ မျိုးများကိုကောင်းမွန်အောင် ဆောင်ရွက်နိုင်သော နည်းလမ်းများရှိနေပါသည်။ ရှာဖွေလေ့လာ၍ မျိုးမပျောက်စေရန် ဝိုင်းဝန်းဆောင်ရွက်သင့်သည်။

အချို့သော စိုက်ပျိုးသူများသည် မိမိစိုက်ခင်းအတွင်းရှိ အပင်မှ အကြီးဆုံးအသီးကို ချန်လှန်၍ မျိုးအဖြစ်
ခံယူနေကြသည်မှာ မှားယွင်းသော လုပ်ဆောင်ချက် ဖြစ်သည်။ မျိုးအဖြစ် ခံယူမည့်အပင်သည် နည်းစနစ်ကျနစွာ သီးသန့် စိုက်ပျိုး၍ မျိုးယူခြင်းသည်သာ မှန်ကန်သော လုပ်ရပ်ဖြစ်သည်။ သာမန်စိုက်ပျိုးထားသော အပင်မှ အလုံးကြီးကြီး အသီးလှလှသည် မျိုးမဖြစ်စေသလို ၎င်းအသီးမှရရှိသော အစေ့သည်လည်း မျိုးစေ့မဟုတ်ပါ သာမန်အစေ့မျှသာဖြစ်သည်။
စိုက်ပျိုးသူက ထိန်းကျောင်းခြင်းမရှိသော အစေ့သည် ပေါက်လွှတ်ပဲစား မိမစစ် ဖမစစ် မျိုးဖြစ်နိုင်သည်ကိုသတိချပ်စေလို သည်။ မျိုးအဖြစ် ဆောင်ရွက်မှသာလျှင်မျိုးစေ့ရနိုင်ကြောင်းတင်ပြအပ်ပါသည်။

မှတ်ချက်။ ။ ယခုရေးသားထားသော စာစုသည်မျိုးခံယူရန်အတွက် ရည်ရွယ်ရေးသားထားခြင်း မဟုတ်သောကြောင့် မျိုးခံယူရန်ဆိုပါက ပြည့်စုံခြင်းမရှိနိုင်ပါ။ မိမိတို့ စိုက်ပျိုးထားသော အပင်များဝတ်မှုန်ကူးခြင်းလုပ်ငန်း အောင်မြင်ကာ သီးနှံအထွက်နှုန်းကောင်းမွန်စေရန်အတွက်သာ ရည်ရွယ်ပါသည်။

Source – Nyan Myint





Leave a Reply

Your email address will not be published. Required fields are marked *